Kjarasamningur KÍ/framhaldsskóla varð laus frá og með 27.febrúar 2015 eftir að samkomulag um vinnumat samkvæmt 6.-13. grein kjarasamnings frá 4. apríl 2014 var fellt.

Samningaviðræður við samninganefnd ríkisins um efni nýs kjarasamnings fara fram undir stjórn ríkissáttasemjara og hafa tveir fundir verið haldnir.
Félag framhaldsskólakennara og Félag stjórnenda í framhaldsskólum starfa nú sem áður saman að samningagerðinni enda starfar félagsfólk í FF og FS eftir sama kjarasamningi.

Samninganefnd FF kom saman 4. mars, ræddi samningastöðu og samningsumhverfi. Niðurstaða fundarins var að freista þess að gera nýjan samning að grundvelli hugmyndafræði vinnumats en með ákveðnum lagfæringum. Áhersla er lögð á að í nýjum samningi verði ekki slakari kjarabætur en í hinum fyrri.
Staðan nú að felldum kjarasamningi er í stuttu máli þannig að öll ákvæði kjarasamnings frá 4. apríl 2014 sem ekki eru komin til framkvæmda falla brott að undanskilinni 5. grein um starfstíma skóla en þó fellur 2. mgr. þeirrar greinar niður.

Ef ekki nást samningar um endurgerð kjarasamnings á grundvelli hugmyndafræði vinnumats þarf í samningagerðinni í öllu falli að semja vegna lengingar starfstíma með nemendum þ.e. fjölgun úr 175 í 180 kennslu- og námsmatsdaga. Þessi breyting kemur til framkvæmda við fulla gildistöku framhaldsskólalaga haustið 2015.

Fulltrúafundur er ársfundur FF og er haldinn þau ár sem aðalfundur er ekki eða oftar ef þurfa þykir eins og lög félagsins kveða á um. Fulltrúafundur var haldinn fimmtudaginn 19. mars á Grand Hótel Reykjavík og sóttu hann 50 fulltrúar frá 29 skólum. Fjallað var um starfsemi félagsins frá aðalfundi vorið 2014, farið yfir fjármál og rætt um stöðu og horfur í samningamálum. Að venju skiptust félagar á skoðunum en var fundurinn lausnarmiðaður og afgerandi stuðningur við áframhaldandi viðræður samninganefndar um endurbætur á vinnumati. Guðjón H. Hauksson MA var kosinn nýr fulltrúi í varastjórn félagsins í stað Elíasar Þorsteinssonar sem baðst lausnar í haust.

 

Oddur S. Jakobsson, hagfræðingur KÍ hélt erindi um launaþróun með tilvísun til nýútkominnar skýrslu heildarsamtaka vinnumarkaðarins um efnahagsumhverfi og launaþróun. Hann fjallaði einnig sérstaklega um laun í 28 ríkisreknum framhaldsskólum á árinu 2014. Þar kom m.a. fram að munurinn á hæstu og lægstu dagvinnulaunum í skólunum 28 var 12% en munur hæstu og lægstu heildarlauna var 24,3%. Dreifingu meðallauna má sjá á myndinni hér fyrir neðan þar sem lesa má dagvinnulaun af láréttum ás en heildarlaun af þeim lóðrétta.

Fulltrúar Félags framhaldsskólakennara sóttu fund á vegum norrænu kennarasamtakanna NLS 12.-13. mars síðastliðinn. Þema ársins í ár er: „Traust- leiðin að sterkari kennarastétt“ (Tillit - vägen till en starkare lärarprofession). Aðalerindi fundarins flutti Petter Skarheim frá norska menntamálaráðuneytinu. Í erindi sínu fjallaði hann mikilvægi skólans í samfélaginu. Hann sagði að áhrif skólans á samfélagið yrðu ekki ofmetin og að ef skólakerfið væri ekki gott virkaði samfélagið ekki. Því yrði það að vera algert forgangsmál í hverju velferðarsamfélagi að styðja við kennara og skólastarf. 

Á fundinum var auk þess farið yfir stöðuna í samninga og kjaramálum hjá félögum okkar á Norðurlöndunum. Þar kom í ljós að alls staðar hefur verið unnið að talsverðum breytingum sem tengjast pólitískum stefnumörkunum sem hafa haft áhrif ávinnutíma kennara.

Í Danmörku náðu kennarar ekki að semja um breytingarnar heldur fengu skólastjórnendur fullt umboð til að ráðstafa vinnutíma sinna kennara í kennslu, undirbúning og önnur störf á verkssviði kennara. Samningarviðræður þar í ár gengu ú út á að ná í gegn bindandi viðmiðum um skiptingu vinnutímans, en fulltrúar danska ríkisins lögðust gegn því af fullum þunga. Í stórri könnun sem sem gerð var kom í ljós að ástandið í skólunum nú er ekki gott og kennarar gefa eftirfarandi mynd af ástandinu í skólunum:

- aukið vinnuálag
- minni samskipti við stjórnendur
- skortur á forgangsröðun
- slæmt skipulag á verkum
- of lítill tími í undirbúning kennslu
- slæmt starfsumhverfi
- merki um atgervisflótta og þreytu