5 cousas que marcarán como comerás durante este ano (ou as comidas que serán tendencia)
Se pensades que o que comedes non está marcado polas modas, estades profundamente equivocados. As tendencias chegan ao supermercado, onde os cambios en como os millennials fan a compra (agora pasan de facer lista da compra ou de ir de xeito semanal e mercan as cousas por intereses e non tanto por exemplo porque todos sabemos que tes que facerte cun certo número de cartóns de leite cada certo tempo) están modificando os produtos que ves e mesmo como están colocadas as cousas. E as modas tamén chegan ás cartas dos restaurantes. Ou pensades que o boom das hamburguesas gourmet foi unha coincidencia cósmica?
Segundo Pinterest, que deu unha predición sobre o que molará en 2015 alá polo Nadal, este ano imos tolear pola coliflor (ben, non toda a redacción de Disquecool está disposta a sumarse á moda) e beberemos zumes de froitas (moitas froitas, especialmente se teñen regusto estraño). Pero estas non serán as únicas tendencias que cambiarán o que comemos. Segundo Mintel (unha desas consultoras de mercado que fan análises super sesudos sobre as tendencias de consumo), cinco serán as grandes tendencias que marcarán este ano os nosos hábitos alimenticios. Preparados para descubrir que estará de moda?
O que comemos non marca a nosa dieta: é unha expresión dun estilo de vida
Esa é a primeira conclusión do estudo. As persoas xa non ven os alimentos simplemente como o que che quita a fame ou como o que tomas para seguir a dieta X ou a Z. Agora os alimentos son un xeito máis de expresar o que somos. Os consumidores, din, están cada vez máis preocupados pola saúde (como todas as cousas sobre tendencias, o estudo parte de datos de EUA) e por tanto teñen unha “aproximación holística” á mesma. Non é só facer deporte, tamén é comer san e marcar posicións empregando a comida. Aínda así, o termo ‘dieta’ está pasando de moda (e non mola) e a xente comeza a pensar non no efecto inmediato do que comen senón no futuro. (E aínda así o que está de moda non é ser un tolo que non se permite nin unha mínima indulxencia: podes tomar ese anaco de chocolate que tes na man)
O transparente “é o novo verde”
Durante anos todos os produtos que intentaban convencernos de que eran os mellores empregaban as mesmas armas: do campo á túa mesa, bio, orgánico, e toda trapallada verde que se lle ocorrera (agora polo menos hai unha regulación clara e non vale con dicilo, hai que ser realmente verde). Pois ben: ser verde – ou aparentalo (ser verde de verdade esta moi ben) – xa non é que mola. Agora os consumidores queren que as marcas sexan limpas. E por limpas enténdamos transparente. Listas de ingredientes, poder seguir realmente o itinerario do campo á túa mesa, ver claramente no packaging os beneficios das comidas... Iso é o que está de moda.
Todos levamos dentro un pequeno chef (si, si, agora todos somos Remy)
Cal era a gran lección que aprendemos con Ratatouille, esa sublime película? Como ben dicía Remy, a rata protagonista, calquera pode ser chef. Só hai que desexalo e esforzarse (ben, para ser chef de verdade hai que ter talento e anos de traballo, pero deixémolo no xenérico). Hoxe todos queremos ser como Remy. Todo o mundo quere cociñar como un chef famoso e facer eses pratos tan especiais. Como todo o mundo non é quen de facelo, o mercado estase enchendo de produtos que cho dan todo xa máis ou menos feito para conseguilo.
As medias tintas acaban de morrer
Unha das consecuencias que a crise está tendo nas pautas de consumo é que os estremos están crecendo en poder. Quen están triunfando? Por unha banda están as marcas de luxo, que non perderon mercado. Pola outra, están as de desconto que fan do barato o seu punto clave. O mesmo pasa na comida. O que queda no medio está en serio perigo de desaparecer: ou se é un produto de luxo digno do Sánchez Romero (tamén coñecido como o supermercado máis caro de España) ou se é un paquete de galletas de aspecto desleixado que un podería atopar no Dia. Ou se ofrecen prezos moi baixos ou un valor moi elevado.
Velaí vén internet
Internet xa está ocupando todas e cada unha das partes da nosa vida. Tamén o fará coa comida. Cada vez mercaremos máis comida e máis bebida online: esa será unha das grandes áreas de moda no ecommerce. A lista da compra será cada vez máis electrónica.
|