'n Koffie-drink-kuierbrief van huis tot huis

Iets uit my hart

Dit is goed om te weet as iets goeds op die regte tyd gebeur. Soms is 'n mens gesteur deur iets wat ontydig gebeur. Ek het hierdie week Tannie Anna Hartley begrawe nadat sy op ses-en-negentigjarige ouderdom oorlede is. Die opmerking van een van haar dogters was: "Dit was so skielik". Die wysheidsboeke in die Bybel praat van 'n tyd om te kom en 'n tyd om te gaan. Die Bybel sê ook ons tye is in God se hande. Vir ons is tyd geld - daarom moet ons dit alte goed spandeer! Vir God is tyd anders. Gevul met barmhartigheid, genade en geleenthede. Tyd is waar God aan't werk is. Tyd is waar Hy ons nooi om saam te werk. Tyd is 'n genadegawe - 'n geskenk met onbeperkte moontlikhede. 'n Leeftyd vir ons is vir God 'n oomblik. En elke oomblik in ons lewens is vir God kosbaar.

'n Nuwe era breek nou vir Hoogland aan. Ons nuwe dominee, Pieter Nel, sy vrou, Sanet en hul twee kinders, Lizeri en Janno het by ons aangesluit. Dis 'n nuwe tyd vir hulle as gesin, vir Pieter in sy bediening, én vir Hoogland. Baie welkom aan julle gesin! Mag julle die tyd wat die Here julle in Hoogland gebruik ryklik seën, mag julle gelukkig wees, julle gawes uitleef en beleef dat dit die regte tyd en plek is om julle roeping uit te leef. Mag die Woord wat jy gaan saai, Pieter, op vrugbare grond val, in mense se lewens ontkiem en vrug vir God se Koninkryk voortbring. 

Dis goed om te weet julle is hier. Nou kan ek my bokse begin pak.