'n Koffie-drink-kuierbrief van huis tot huis

Die reformasie het vir Luther teen ’n hoë prys gekom.  Hy het nie die luukse van ’n ivoortoring gehad van waar hy sy teologie kon bedryf nie.  Aan die einde van sy lewe, in 1546, het hy baie vreugdes en baie hartseer beleef.  Baie van sy ou vriende het hul rug op hom gedraai.  Vir die grootste deel van sy lewe was hy as ’n krimineel beskou en moes hy vir sy lewe vlug.  Sy gestel het nooit regtig herstel van die asketiese lewe wat hy as priester geleef het nie.  Hy het gely aan depressie.  Hy het getwyfel en baie met God geworstel.  Sy teologie is nie in ’n vakuum gevorm nie – maar in die loopgrawe van die alledaagse lewe.

Neem nou maar net Luther se liefdeslewe as voorbeeld hiervan:

Luther se eie ribbebeen

Luther was vir die grootste deel van sy lewe ’n geswore oujongkêrel – maar hy het sy moses teëgekom in die non, Katharina von Bora.

Katharina was lid van ’n klooster-orde, maar wou daarúít ontsnap – iets wat lewensgevaarlik was.  Luther en sy vriend, Leonard Koppe – ’n vishandelaar – het ’n plan bedink.  Toe Koppe sy gewone bestelling van vis by die klooster aflaai in houtvate het 12 nonne wat wou ontsnap binne-in die leë vate weggekruip en is hulle na Wittenberg gebring waar Luther geskikte mans vir hulle moes vind.

Een van die nonne, het dit later geblyk, was maar redelik uitsoekerig.  Luther was ten gunste daarvan dat priesters moes trou, maar was nie eintlik self van plan om die groot stap te waag nie.  Een rede daarvoor was dat hy ’n vlugteling was met ’n doodsvonnis wat oor sy kop gehang het.  Hy wou nie ’n gesin aan dié gevare blootstel nie.  ’n Ander, nog groter rede, was dat hy eenvoudig gemaklik was met die lewe van ’n oujongkêrel.  Katie het egter ander planne vir hom gehad!

Luther sou later erken dat hy nie met haar getrou het uit liefde nie.  Hy wou graag vir sy ouers kleinkinders gee en hy wou die pous terugkry!   Katie het egter haar sin gekry én Luther se hart gewen!  Hulle storie is ’n liefdesverhaal soos min ander in die kerk se geskiedenis.  Luther het haar “Katie, my ribbebeen” genoem en het geskryf:  “Daar is nie ’n soeter eenheid as die eenheid wat gevorm word in ’n goeie huwelik nie”.

Hulle het 6 kinders van hul eie gehad en het nóg kinders aangeneem wat wees gelaat is deur die pes wat deur Europa versprei het!