Copy

Ilisimatusarfik news - shaping the Arctic


Tukumminnguaq Islandimi nersornaatisivoq


Allagaq manna oqaluttuamik nuannersumik aallartissavarput.

Ilisimatusarfimmi ilinniartoq Tukumminnguaq Nykjær Olsen ukioq manna Arctic Circle 2017-imi peqataavoq – unammisitsinermilu Harvard Kennedy School of Government-imit aaqqissugaasumi ajugaavoq. 

Ilinniartut pikkorissut Issittormiut aqqaneq-marluk allat unammeqataapput, tamarmillu immikkut Issittumi atukkanik qanoq pitsanngorsaasoqarsinnaaneranik isumassarsiaminnik immikkut ittunik saqqummiussisussaapput. 

Tukumminnguup ilinniartut pikkorissut, tamarmik immikkut torraasunik isumassarsiaqartut unammivai,  Tukumminnguilli isumassarsiani ajugaassutigaa. Isumassarsiaa qulequtaqarpoq: "Innovation is about inclusion - let’s make Arctic inclusive" ("Nassaassarsiullaqqinneq peqataatitsineruvoq - Issittoq inunnik peqataatitsiffiuli"). 

Tukumminnguup isumassarsiaa Issittumi qanoq akuutitsisoqarnerusoqarsinnaaneranut tunngavoq, oorlu makkununnga:

  • Ullumikkut meeqqat atuarfianni nunap inoqqaavisa namminneq ilisimasaannik nunanilu killerni ilisimariikkanik akuutitsinerusoqartalissaaq
  • Nunap inoqqaavi pillugit ilisimasat taamaallaat nunap inoqqaavinut naleqqussagaassanngillat, aamma inuit avataaneersut ilisimasaqarnerulissapput,  taamaalillunimi paatsoornerit taamaattussaannartullu isiginninnerit pinngitsoorneqarsinnaapput kiisalu kulturinut allanut ammaassissallutik


Ilisimatusarfiup Tukumminnguaq nersornaatisinerani pilluaqqungaarpaa.

Assiliisoq: Ulunnguaq Markussen


Ilisimatusarfik Issittumi ilisimatusarnermi qitiusoq


Ilisimatusarfiup Issittumi ilisimatusarnerup iluani sooq pingaarutilimmik inissisimasariaqarneranik ukiorpaalunngortuni tunngavilersuisarsimavoq – una anguniarlugu ilisimatusarnermi paasisanik Ilisimatusarfik nunatsini qtiusumik ataqatigiissaariviussasoq.

Taama ataqatigiissaariviusariaqarnermut pissutaavoq ilisimatoorpassuarnut nunanit allaneersunut nunatsinilu ilisimatusartunut Ilisimatusarfik ataqatigiissaarisooreermat. 

Ilisimatusarfik qitiusumik ataqatigiissaariviulerpat tamanna nunatsinnut tamarmut iluaqutaassaaq – tassami issittumi ilisimatusarneq (aammami sunilluunniit ilisimatusarneq) inuiaqatigiit ineriartornerannut pingaaruteqarmat; nutaaliornemut, inuussutissarsiornikkut ineriartornermut ilisimasaqaleriartornermut  il.il.

Taamaaliornikkut aamma Issittumi ilisimatusarnikkut paasisat nunatsinnut pituttorneqarsinnaapput, nunatsinni iluaqutaalersinnaanngorlugit.

Ilisimatusarfik qitiusumik ataqatigiissaarisoralugu ilisimatusarnermi paasisanik ataqatigiissaarivimmik pilersitsinissap iluaqutissartai amerlapput:

  • Issittumi ilisimatusaatit nunatsinni sorlaqartariaqarnerannik , taamalu inuiaqatigiinnut iluaqtaanerunissaannik pisariaqartitsineq ilisimaneqarnerulersissavarput.
  • Nunatsinni ilinniarfiit assigiinngitsorpassuit pitsanngorsaaqataaffigisinnaavagut.
  • Ilisimatuutut misissuinernut, ataatsimiinnernut paasiniaaqatigiinnernullu il.il. tunngatillugu ilisimatuunik nunanit tamalaaneersunik amerlanerusunik peqataasoqartarnissaa angusinnaavarput.
  • Kalaallit ilinniarluarsimasut nunatsinnut uternissaannik kajuminnerulersissinnaavagut maani ilisimatuussutsikkkut suliallit amerlippata

Taamaattumik ilisimatusarnermi paasisanik ataqatigiissaarivik Ilisimatusarfiup ineriartornerani alloriarnerinnaanani Kalaallit Nunaannut tamarmut aamma iluaqutaassaaq.


Tusagassiuutit 2018 – Kalaallit Nunaanni tusagassiuutinik misissuineq

 

Nunatsinni tusagassiuutit demokratiimut pingaaruteqarluinnarput. Tusagassiuutimmi innuttaasunut siammasissumik inissisimasunut paasissutissiinermi pingaaruteqarluinnartuupput ataqatigiissitsillutillu. Taamaattumik Kalaallit Nunaanni tusagassiuutit oqallisaangaatsiartarput. 

Ilisimatuutut misissueriaaseq nutaaq, ''Tusagassiuutit 2018”, tusagassiuutinik tusagassiuutillu imarisaannik oqallinnermut tamatumunnga ilapittuutaassaaq. Misissuineq ima ingerlanneqassaaq ulluni aalajangersimasuni tusagassiorfiit ilanngutassiaannik katersukkat misissorneqarnerisigut. Taama misissuinikkut ilaatigut erseqqissisinneqassaaq kikkut oqaaseqartinneqartarnersut kikkullu oqaaseqartinneqartannginnersut, suut tusagassiarineqartarnersut suullu ilanngunneqarneq ajornersut.

Taamaaliortoqassaaq tusagassiuutini sammineqartunik annertuumik akusiuinikkut ilisimatusarnermi apeqqut una apeqqutigalugu: 2018-imi Kalaallit Nunaanni tusagassiuutit imaat sukkut assigiissuteqarpat?

Tamatuma saniatigut Tusagassiuutit 2018-imi aamma sukumiisumik misissorneqassaaq Kalaallit Nunaanni tusagassiuutit qanoq tunuliaqutaqarnersut (tusagassiorfiit suunersut, qanoq annertutiginersut, aningaasaqarnerat qanoq innersoq, kimit pigineqarnersut il.il.). 

Misissuinermi paasissutissat databankimut katersorneqassapput misissuinerni allani, soorlu kandidatinngorniartut ph.d.-nngorniartullu atorsinnaasaannut, kiisalu tusagassiortunik ilinniartitsinerup ilisimatusarnermik tunngaveqarnerusumik ilinniartitsinerani atorneqassallutik. 

Ukioq allortarlugu taamatut misissuisoqartassaaq, taamaalilluni Kalaallit Nunaanni tusagassiuuteqarneq tusagassiarineqartullu qanoq ineriartornersut ersersinneqartassalluni. Misissuinerup inerneri nalunaarusiami atuaruminartumi saqqummiunneqassapput. Nalunaarusiaq siulleq 2018-imi ukiakkut saqqummersinneqassaaq.

Ilisimatuutut misissueriaaseq nutaaq pillugu nittartakkatsinni paasisaqarnerusinnaavutit.


Kalaallit Nunaanni Tusagassiornermik Ilinniartitsineq 1982 - 2017

 

Nunatsinni tusagassiortunngorniarfimmik ilinniarfeqalerneraniit ukioq manna ukiut 35-t qaangiunnerat malunnartinniarlugu Ilisimatusarfik atuakkamik saqqummersitsivoq qulequtalimmik ”Kalaallit Nunaanni tusagassiornermik ilinniartitsineq 1982-2017 – Journalistuddannelsen i Grønland 1982-2017”. Atuakkami ilinniarfiup aallartinnera ukiullu siulliit inuussutissarsiummik ilinniartitsinertut ingerlaneq soqutiginartumik oqaluttuarineqarput, Ilisimatusarfimmut ilanngunneqarnissap tungaanut ilinniarfiup ineriartornera sammineqarluni kiisalu ilinniarfiup siunissaa, ilisimatuutut misissukkanik tunngaveqarnerusoq aamma iserfigineqarluni. Atuakkami ilinniarfimmi pisortaasimasut ilinniartuusimasullu soqutiginartunik quianartunillu eqqaamasalersaarput, aammali ilinniartitseriaatsit nutaaliaasut kiisalu tusagassiortut akornanni pingaartitat tusagassiortutullu kinaassuseq sammineqarlutik. Taamaalilluni atuakkiaq oqaluttuarisaanermut pingaarutilinnik imaqaannarani siunissami tusagassiortunngorniat ilinniartitaaneranni pitsaassutsimut piumasaqaatit, oqaatsitigut piginnnaasassat tusagassiortutullu piginnaasat ukiuni makkunani pisariaqartinneqartut eqqartorneqarput. 

Atuakkamut ilanngussisut ilagaat Aqqaluk Lynge, Kuupik Kleist, Rie Rasmussen aamma Sofia Geisler kiisalu ilinniartuusimasunit Malînánguaq Marcussen Mølgaard, Noah Mølgaard aamma Heidi Møller-Isaksen. Atuakkap siulequtaani ilinniarfimmi pisortaq Naja Paulsen ima ilaatigut allappoq:

”Ukiut taakkua ingerlaneranni tusagassiortut inuiaqatigiinnut tusarliussisarsimapput nutaarsiassanik, paasisuukkanik inuillu pisarnerinik oqaluttuanik tusaruminassasunik tusaruminaassinnaasunillu. Tusagassiortut taakkua ilarpassui nunatsinni tusagassiornermik ilinniarfimmi ilinniarsimapput. Nunatsinni tusagassiornermik ilinniartitaaneq ukiut ingerlaneranni umerualaarneqarlunilu oqallisaasar­si­mavoq, ataasiaranilu apeqquserneqartarsimalluni ilumut atuuttariaqarnersoq. Ilinniarfiup kusanarluinnar­tuusussanik eqqarsaateqarluni anguniagaqarlunilu pilersinneqarneranit maanna ukiut 35-t qaangiupput, isumaqarpugullu unikaallalaariarluta sumut killinnerput naatsorsulaartariaqaripput”.

Atuagaq 212-inik qupperneqarpoq kalaallisut qallunaatullu allagaalluni, tuluttullu imaqarniliorneqarluni. Assitaasa amerlanersaat ilinniartut naammassineriniit assilisaapput.

Atuagaq pisiarineqarsinaalereerpoq Ilimmarfiup saaffiginnittarfiani kiisalu atuagaarniarfimmi Atuagkat Boghandelimi (website).


Ilisimatusarfimmit saqqummersitaq nutaaq

 

Nunatsinni kulturimut inuiaqatigiinnullu tungasunik Ilisimatusarfimmit ilisimatuutut misissuinerit atuaganngortinneqarnerat auarumaneqartaqisoq nutaaq saqqummerpoq.

Saqqummersitap qulequtaraa "Grønlandsk Kultur- og Samfundsforskning 2015 - 2017".

Saqqummersitaq allaaserisanik ukuninnga imaqarpoq:
  • Karen Langgård: Tekst og illustrationer i grønlandske børnebøger - med fokus på billedbøger inden for fiktionsgenren
  • Flemming A.J. Nielsen: Hyldest til Christian VI - begyndelsen til en grønlandsk litteratur
  • Birgit Kleist Pedersen: Navaranaaq - en grønlandsk 'malinchista' eller 'Den Monstrøse Anden' i os selv
  • Kurt Møller Pedersen: Geografiske kort af drivtømmer
  • Rusannguaq Rossen: "Jeg ringer efter politiet! Sådan kan I ikke behandle den grønlandske nationaldragt" - uenigheder om identitet og kulturelle udtryk i grønlandsk mode
  • Jette Rygaard og Susan Vanek: "Smukke umoralske kvinder": Rejsebeskrivelser og 'den anden' i Rockwell Kents 'Salamina'
  • Steven Arnfjord: Hjemløshed i Nuuk - et kritisk sociologisk og planlægningsperspektiv
  • Peter Berliner, Rita Thomsen, Rikke Toftgaard Rossen, Lærke Jensen og Mette Sonniks: Familieklasser i Nuuk - en problemoplæsende praksis
  • Merete Watt Boolsen: Lidenskab, videnskab og selvværd på Ilisimatusarfik - Danmarks Evalueringsinstituts rapport om den grønlandske folkeskole
  • Kathrine Kjærgaard: Citizenship Education in Greenland - elucidated by analysis of curriculum
  • Annemette Nyborg Lauritsen: Robin Hood i samfundstjeneste - de første erfaringer med den grønlandske samfundstjenestedom
  • Jens Lei Wendel-Hansen: De grønlandske forstanderskaber i et dansk repræsentationshistorisk perspektiv

"Grønlandsk Kultur- og Samfundsforskning 2015 - 2017” pisiarineqarsinnaavoq Ilimmarfiup saaffiginnittarfiani imaluunniit nittartagarput aqqutigalugu.


Letlandimi Nordic Summer University


Allattoq: Peqqissaasunngorniaq Parnuuna Eriksen, 7. semester.

Aasaq Nordic Summer Universitymi aappassaaneerlunga peqataavunga – ilinniartutullu tamanna periarfissaavoq nuannerluinnartoq. Ukioq manna peqataalluni soqutiginarpoq International Relations aamma Human Rights ilinniagassattut toqqarakkit.

Nordic Summer University (NSU) faginut arlalinnut tunngasunik misissuinermik ilisimatuutullu misissuinermik nunani avannarlerni ataqatigiissitsisuuvoq. Ilisimatusarfiuvoq namminersortumik ingerlataasoq, ataatsimeersuarnernik aaqqissuussiffiusoq, peqataasussanillu assigiinngitsunik pisinnaasalinnik Nunani Avannarlerni Baltikumimiittunilu nunanit tamalaaneersunik qaaqqusisoqartarpoq. NSU tunngaviusumik isumassarsiorfittut ingerlavoq. Nunat tamalaat akornanni ataqatigiissutissanik eqimattanillu faginut arlalinnut tunngasunik ilisimatuutut misissuinernik isornartorsiuinermillu suliaqartunik pilersitsilluni ilisimatuussutsikkut isumassarsiornikkullu suliniutigineqartunik ineriartortitsiniarfiuvoq. NSU naalagarsiornanngitsumik aaqqissuussaavoq, eqqumiitsuliortoqarpoq, bachelorinngorniaqarluni kandidatinngorniaqarlunilu, ph.d.-nngorniartoqarpoq, ilisimatooqarpoq allanillu ilinniarsimasoqarluni. NSU-mi sammisassaqartarpoq assigiinngitsunik sammisassaqaqatigiiffiusartunik, sammisaqaqatigiillu tamarmik immikkut Nunanit Avannarlerneersut Baltikumimeersullu aasakkut ukiukkullu ukiut pingasut ingerlaneranni naapeqatigiittarput.

Letland

Pingasunngornikkut ullaakkut Metrokkut Kastrupimut mittarfiliarpunga – gatemilu NSU-mut peqataajartortut danskit siorna naapitakka takoqqippakka. Rigamut (Letlandimi illoqarfiit pingaarnersaannut) apuukkatta bussinik aaneqarpugut, tassanilu NSU-mut peqataasussat allat naapippakka, illoqarfeeqqamullu Saulkrastimut ingerlanneqarpugut.

Saulkrastimut pigatta campingvognitsinnut matuersaammik tunineqarpugut. Peqataasut tamangajammik campingvogninut inissinneqarput, sapaatillu-akunnera naallugu tamanna oqallisaavoq. Ilaat pitsaasunik allallu pitsaavallaanngitsunik inissarsipput, allallu campingvognii ima ajortigipput sialummik isaasuunnginniassagamik plastikkimik qallertariaqarlutik. Peqataasulli 167-it tamarmik nuannisarput.

NSU-mi qulingiluanik sammisaqaqatigeeqarpoq, sammisaqaqatigiillu ataatsit meeqqanik, peqataasut meeraannik, paarsiffiulluni. Sammisaqaqatigiit nal. 9.00 aallartittarput nal. 15.00 unittarlutik – pisullu tamarmik tuluttut ingerlanneqartarput. Ullut tamaasa nal. 15.30 inersuarmi tamanik oqallissaaraluni saqqummiussisoqartarpoq, tamatumalu kingorna unnukkorsiortoqartarpoq kulturikkullu sammisassaqartarluni. Ilaatigut Letlandimiutut qitinnermik takutitsisut isiginnaarpavut erinarsoqatigiillu niviarsissat tusarnaarlugit.

Uagut sammisaqaqatigiiffitsinni International Relations aamma Human Rights pillugit assigiinngitsunik saqqummiussisoqarpoq. Ilaatigut Polenimi meeqqat atuarfianni upperisarsiorneq inuiaassuserlu pillugit, inuttut pisinnaatitaaffinnik qanoq paasinnittoqartarnera pillugu, sorsunnerni qallunaat sakkutuuisa isumannaassusiat pillugu nunanullu allanut attassuteqarneq pillugu saqqummiussisoqarpoq.

Arlaleriarlunga aperineqarpunga peqqissaasunngorniaallunga sammisaqaqatigiiffimmut tamatumunnga qanoq ilaalersimanersunga, peqqissaanerup nunanut tamalaanut tunngasunut inuttullu pisinnaatitaaffinnut qanoq tunngassuteqarnera paasiuminaatsikkamikku. Naatsumik nassuiaanneqarput Kalaallit Nunaanni peqqinnissamut isumaginnittoqarfiup Danmarkimut Islandimullu napparsimasullu pisinnaatitaaffiinut atassuteqarnera pillugu. 

NSU-mi avatangiisit nuannertuaannarput, inersimasut meeqqallu imminnut ataqatigiilluarput. Ukiut tamaasa generalforsamlingeqartarpoq aappaaguani sammisaqaqatigiiffinni sammisassat toqqarneqartarlutik, nunallu tamarmik sinniisoqartarput nunarpullu Islandimut Savalimmiunullu ilagitinneqartarluni. 

Sapaat qasuersaarfiujuaannarpoq illoqarfimmut allamukarnissamut periarfissaalluni – siumut utimullu busseqarnissaa aaqqissuunneqarsimasarmat. Uanga Siguldaliarpunga Gauja National Parkip sumiiffianut – tamatumalu kingorna Castleliliarpugut. Unnukkut taqusserluta sissaliakaasarpugut. 

Ileqqoq malillugu ullormi kingullermi arsaattoqarpoq, jantekkut dantekkunnut (Humanitiesikkut Social Sciencesikkunnut) imminnut unammillutik, tamatumalu kingorna nerersuartitsisoqarpoq qittattoqarlunilu illoqarfimmeersunik unnuk naallugu nipilersortoqarluni. 

Nunanit Avannarlerneersunik Baltikumimeersunillu NSU-mi assigiinngitsunik tunuliaqutalinnik naapitaqarnaqaaq. NSU-miinnera assut ilikkagaqarnaqarpoq – allat NSU-mut peqataaniaqqullugit kajumissaaginnarsinnaavakka.


YouTubekkut toqqaannartumik aallakaatitsineq


Ilisimatusarfimmi tamanut ammasumik soqutiginartumik oqalugiartoqartarpoq tamakkulu inunnit suli amerlanerusunit iluaqutigineqaqqullugit Youtubemi kanalitsigut toqqaannartumik aallakaatitsisarpugut.

Oqalugiaatit makku toqqaannartumik aallakaatinnikuuagut:


Eqqaamajuk nittartakkatsinni takuneqarsinnaasarmata tamanut ammasumik oqalugiaatigineqartussat – kiisalu sorliit Youtubekkut toqqaannartumik aallakaatinneqassanersut.

Ilisimatuumik ujarlerneq


Immikkut ilisimasalimmik amigaateqarpit - assersuutigalugu ilanngutassiassamut imaluunniit assigisaanut?

Taamaappat ikiortissaq qujanartumik uaneralaannguamiippoq.

Nittartagarput website aqqutigalugu nalunaarsuutinik peqarpugut, ilisimatuunik assigiinngitsunik immikkut ilisimasalinni ujarlernissamut periarfissalik.

Saqqummersitat


Atuisutta nittartakkatsinni website periarfissaq nutaaq takusinnaavaat: ilisimatuut saqqummersitaannik ujarlertoqarsinnaavoq.

Atuakkiortoq, qulequtaq, imarisaa il.il. ujarneqarsinnaapput.

Saqqummersitanut quppernerput nutarterneqartuarpoq - taamaattumik suliamut tunngasunut isumassarsiornissamut alakkaagit.

Pisussat


Ilisimatusarfimmi assigiinngitsunik aaqqissuussisarpugut - tamanut soqutiginaatillit.

Piffissami aggersumi soorlu, aaqqissuunneqassapput makku:
Nittartagarput website aqqutigalugu pisussat pereersullu atuarsinnaavatit.

Tusagassiuutit


Qaammammi kingullermi Ilisimatusarfik tusagassiuutikkut assigiinngitsunik taaneqartarpoq:

Nittartagarput website aqqutigalugu tusagassiuutikkut taaneqarsimanerit pillugit atuarsinnaavatit.
Ilisimatusarfik | Grønlands Universitet | University of Greenland

Postboksi 1061 | 3900 Nuuk | www.uni.gl | mail@uni.gl | Oq.toqq. +299 38 56 00
Aaqqissuisut - attavissat ..
Facebook
Twitter
Instagram
YouTube
LinkedIn






This email was sent to <<Email Address>>
why did I get this?    unsubscribe from this list    update subscription preferences
Ilisimatusarfik | Grønlands Universitet | University of Greenland · Postboks 1061 · Nuuk 3900 · Greenland

Email Marketing Powered by Mailchimp