Beste Luisteraar

Dis nog te warm in die meeste dele van die land om te dink aan herfs en winter, dus noem ons dit láát somer, en ons omarm nog ‘n stukkie van die romanse van Valentydsmaand met ‘n rooi roos en die ontvlugting van ‘n kort liedfdesverhaal.

Ek is altyd verstom om te hoor hoe ver in die wêreld na RSG geluister word, en hoe graag mense wil help waar hulle kan. Die storie van Ruiterbos se beertjies maak mens se hart sommer warm.

Martelize gee ons ‘n kykie agter die skerms van haar deelname aan ‘n rolstoel-uitdaging in George, ‘n RSG-luisteraar vertel van die dag toe sy die Parlementsopening bygewoon het, en die video's van vier geoloë se ekspidisie na Antarktika is besonder insiggewend.
Ons het ‘n nuwe aand-boekvoorlesing, ‘n nuwe vervolgdrama saans en moenie vergeet van ons dokumentêre programme Donderdagaande nie.
Volgende keer vertel ons jou van nóg nuwe dinge! Maar kom kuier intussen saam met ons by die Woordfees op Stellenbosch.