Kæru foreldrar

Nú eru dagar farnir að lengjast og vorið á næsta leiti. Námsviðtöl vorannar eru nýafstaðin.
Nemendur í 7. bekk og umsjónarkennarar þeirra dvöldu vikuna 6. - 10. mars í skólabúðum Reykjaskóla í Hrútafirði.
Nemendur í 9. bekk fóru svo vikuna á eftir 13. - 17. mars með umsjónarkennurum sínum í Ungmenna- og tómstundabúðirnar að Laugum í Sælingsdal.

Framundan á vorönninni er meðal annars nemendaþing, skíðaferð í 5. - 10.bekk, páskaleyfi nemenda og Unglistaleikar.

Stóra upplestrarkeppnin fór fram í síðustu viku við skemmtilega athöfn. Öllum þátttakendum var afhent viðurkenningarskjal ásamt rós að upplestri loknum en fulltrúar skólans árið 2017 eru þær Valgerður Eyja Eyþórsdóttir, Helga Sigríður Kolbeins og varamaður er Lilja Dögg Jóhannsdóttir.

Mikil gleði og gaman var á öskudaginn en nemendur komu skrautlegir til fara í skólann og mátti sjá hinar ýmsu furðuverur. Eins og hefð er hjá okkur hér í skólanum þá var skemmtileg dagskrá í Íþróttamiðstöðinni þar sem kötturinn var sleginn úr tunnunni og nemendur gátu leikið sér í risarólu, hoppköstulum, bandý og fleiru skemmtilegu.

Hér að neðan má sá nokkrar myndir frá litríkum öskudegi en í myndasafni á heimasíðu skólans www.alftanesskoli.is má sjá fleiri myndir.

Gott samstarf á sér stað milli leik- og grunnskóla hér á Álftanesi þ.e. Náttúruleikskólans Krakkakots og Heilsuleikskólans Holtakots og Álftanesskóla. Haldnir eru reglulegir fundir með leikskólakennurum beggja leikskóla ásamt tengilið Álftanesskóla. Leikskólabörnin koma í reglulegar heimsóknir yfir veturinn m.a. í myndmennt, íþróttir, tónmennt, heimilisfræði og til 1. bekkjarkennara. Jafnframt fá leikskólabörnin að kynnast matsal og Frístund.

 

Tvisvar á vetri heimsækir 1. bekkur leikskólann sinn, leikskólana Krakkakot og Holtakot hér á Álftanesi. Markmiðið þessarar samvinnu er að skapa samfellu í námi og kennslu barna/nemenda á þessum tveimur skólastigum og stuðla að vellíðan og öryggi barna við að fara úr leikskóla í grunnskóla.

Nemendaþing Álftanesskóla verður haldið í fjórða sinn þriðjudaginn 28. mars. Nemendur úr 8. - 10. bekk sem eru í félagsmálavali skólans skipuleggja, setja upp og stjórna samræðuhópum undir verkstjórn Siggu Lísu kennara síns.

Þingið verður haldið í Íþróttamiðstöðinni með nemendum í 5. - 10. bekk.

Stefnt er að því að fara í skíðaferð með 5. - 10. bekk þriðjudaginn 4. apríl ef færð og veður leyfir. Nánar auglýst síðar.

Skóladagatal 2017 - 2018 fyrir grunnskóla Garðabæjar var afgreitt á skólanefndarfundi Garðabæjar 15. febrúar sl. Dagsetningar fyrir samræmd könnunarpróf Menntamálastofnunnar í 4., 7., og 9. bekk verða birtar á skóladagatalinu þegar þær hafa borist skólanum.
Skóladagatalið má finna á heimasíðu skólans www.alftanesskoli.is

Páskaleyfi nemenda er frá mánudeginum 10. apríl til 17. apríl.
Kennsla hefst samkvæmt stundaskrá þriðjudaginn 18. apríl.