Nánar um dóminn
Félag framhaldsskólakennara stefndi fjármálaráðherra fyrir hönd íslenska ríkisins síðasta vor vegna 7. gr. kjarasamningsins. Greinin varðar þá skyldu að endurmeta vinnumat áfanga vegna meginbreytinga á námi í framhaldsskólum. Þótt þrír skólar hafi verið nefndir sérstaklega í greinargerð KÍ snýst málið ekki um einstaka skóla heldur villandi leiðbeiningar MMR til skólameistara sem FF hélt fram að væru brot á kjarasamningi. Gögnum var safnað úr 5 skólum svo reifa mætti áhrif styttingar og námskrárbreytinga á skólastarf almennt. Það voru Kvennaskólinn, Menntaskóli Borgarfjarðar, Fjölbrautaskólinn í Breiðholti, Menntaskólinn í Kópavogi og Flensborg. Lögmaður FF mat það svo að betra væri að stilla fókus á færri skóla en fleiri.
Það ber að árétta sérstaklega að þótt fjallað hafi verið um þrjá tiltekna skóla í dómnum er á engan hátt verið að stefna þeim sérstaklega eða skólameisturum þeirra. Fjármálaráðherra ber ábyrgð á framkvæmd kjarasamnings fyrir hönd ríkisins og fagráðuneyti menntamála fór augljóslega á svig við samninginn með ólögmætum stjórnsýslufyrirmælum til skólameistara haustið 2015, skv. Félagsdómi.
Guðríður Arnardóttir
|