Fimmtudaginn 22. september kvað félagsdómur upp dóm í máli KÍ gegn ríkinu vegna vanefndar á 7. grein kjarasamningsins frá 4. apríl 2014.
Með dómnum fæst viðurkennt að námskrárbreytingar vegna styttingar framhaldsskóla teljast vera "meginbreyting" og skylt er að endurmeta vinnumat áfanga sem tilheyra þeim. Við slíkt vinnumat skal taka tillit til þess hvort aukið álag fylgir nýju fyrirkomulagi, s.s. vegna hraðari yfirferðar námsefnis eða annars sem kann að hafa áhrif á vinnu kennara.
Nú liggur því fyrir að túlkun FF varðandi 7. grein er rétt og við tekur frekari vinna um nánari útfærslu inn í verkefnisstjórn um vinnumat og samninganefnd FF. 

 

Viðræður hafa staðið yfir um nokkurt skeið milli fulltrúa ríkisins og forsvarsmanna þeirra stéttarfélaga sem standa að lífeyrissjóði starfsmanna ríkisins (LSR) um framtíðarskipan lífeyrismála. Nú er komið fram frumvarp um breytingar sem forsvarsmenn stéttarfélaganna hafa ljáð samþykki sitt eftir langar og strangar samningaviðræður. Formaður KÍ, Þórður Á. Hjaltested, tók upplýsta ákvörðun um samþykki miðað við þær forsendur að tryggt sé að félagsmenn beri ekki skarðan hlut frá borði. Frumvarp til breytinga á lögum liggur nú fyrir Alþingi.

Samstarfsráð um starfsþróun kennara og stjórnenda á öllum skólastigum hefur tekið til starfa. Í ráðinu eru fulltrúar MMR, sveitarfélaga, háskóla sem mennta kennara og fulltrúar kennara og skólastjórnenda. Ráðið mun byggja vinnu sína á vinnu fagráðs um símenntun sem starfaði frá 2013-2016.
Samstarfsráðið er vettvangur fyrir samstarf og samráð um starfsþróun og því er m.a. ætlað að greina þarfir skólafólks, taka þátt í stefnumótun og símenntun og vera leiðandi í umræðu og miðlun. Vonandi mun stofnun ráðsins efla starfþróun og áhersla lögð á að menntun verði sameiginlegt forgangsverkefni stjórnvalda og þeirra sem koma að menntakerfinu. 
Fulltrúar framhaldsskólastigs eru Anna María Gunnarsdóttir (FF), Hjördís Þorgeirsdóttir (FS) og Magnús Þorkelsson (SMÍ).

Verið er að ræða ýmis praktísk mál sem snúa að vinnumati o.fl.við samninganefnd ríkisins. Meðan viðræður standa yfir ríkir gagnkvæmur trúnaður á milli aðila um samningsatriði. Alls hefur viðræðunefnd FF fundað sex sinnum með fulltrúum fjármálaráðuneytis og á einum fundi  til viðbótar var rætt um sértæk mál stjórnenda en FF og FS gera sameiginlegan kjarasamning.