‘n Paar nuwe woorde om te leer uit die hartjie van die Kaapse Vlakte

(Ons begin by A en B):

A

• Abdol, Abdoltjie  - ‘n Manlike karakter in Coloured grappies

• ag, agga – ‘ek bedoel’ 

• agtemirrag – namiddag

• All Pay  - staatstoelae vir bejaardes, kinders en mense met gestremdhede (en kan ek byvoeg dat die bywoning van al ons programme met 80% afneem op hierdie dag? 😊)

• ammil, ammal  - almal

• anneste – om anders te wees

• awe, aweh, ahweh  - wanneer jy saamstem met iemand, of iemand groet, of sommer net as jy niks het om te sȇ nie.

• Ay, Ai – ‘n Rastafarier

B 

• bek vekoep  - Nuttelose inligting deel, baie praat 

• biesag,  besig – nuuskierig wees

• Bontas  - Bonteheuwel

• bombela – waar iemand werk

• Bompie – ysie (gevriese koeldrank in ‘n sakkie) 

• boom – dagga of dominoes speel

• bors warm maak – om iemand kwaad te maak

• bottel – bottel rum, whiskey of brandewyn - ‘Ek gaan vir my ‘n bottel kry’.

• bourre  - bobene

• boy'tjie, boy'kie – jong man wat hulp verleen

• bra, brah, brasse – manlike vriende

• breek, briek – aanhoudend lag

• broe, bru, my broe – ‘n aanspreekvorm

• broke – informele straatverkope

• Burg - Vredenburg

• burk, berk – kȇrel (boyfriend)

Liewe It’s Amazing! ZT vriende,

Ek is nie seker hoeveel keer ek hierdie nuusbrief begin skryf het en dan weer alles uitgevee het nie, want wat se mens nou na al die maande wat verloop het vandat ons die vorige nuusbrief uitgestuur het.

Die afgelope maande was vol uitdagings (Lees: geleenthede, soos die slim mense sê) en op elke front was ons as span tot die uiterste beproef. Ook moes ons op ‘n stadium vir mekaar sê dat dit die norm is en dat die gebroke werklikheid is waarin ons onsself bevind.

Wanneer my Loyoloville teachers my bel en sê dat hulle hulleself en die kinders in die wendyhuise moet toesluit, (vir die soveelste keer) omdat daar jong seuns (vanaf die ouderdom van 11) is wat helder oordag met pangas rondloop, of wanneer van die ouers nie eens die moeite wil doen om hulle Babbelbekkie-kinders te was en klas toe te bring nie, dan wil ‘n moedeloosheid mens oorweldig.

Of wanneer die Athwood Primary Arts and Craft teachers my laat weet dat die kinders nie hulle kunswerke kon klaarmaak nie, want al die kinders moes vroeg huis toe gaan omdat Hanover Park weer ‘n oorlogsone is.

Of, soos verlede week, die nuus dat die man wat aan die einde van verlede jaar by ons Babbelbekkieklas in Hanover Park ingebreek het ‘n kerk wou beroof en toe doodgeslaan is deur die buurtwag.

Die gebrokenheid is soms meer as wat ons kan hanteer, soveel dinge wat in die pad staan om die gemeenskap te dien. Tog sien ons wonderwerke (baie daarvan) en weet dat ons ‘n groot en goeie God dien wat elkeen van ons ten diepste ken en liefhet.

Tog kon ek nie help om terug te kyk oor die afgelope 7 jaar nie en dit was alles te danke aan Facebook wat mens se ‘memories’ van tyd tot tyd oproep en jou herinner aan wat was. Nostalgie en dankbaarheid het my oorval. Ek deel ‘n paar memories met die fotos.

Baie dankie vir elke email, Whatsapp boodskap, gebed en telefoonoproep van bemoediging. En weereens baie dankie vir al die ander maniere waarop julle ook vir It’s Amazing! ondersteun.

Wat sal ek sê na dié briefie -  awe, agga, of bek vekoep? Kom ek sê maar net kannallah, kwaailappies en shukaran (asseblief, amazing en dankie).

Seënwense

Lisa

Die kinders word groot

Vergeef my as ek effens sentimenteel is...

Badsberg Close se huis 7 jaar gelede – daar is nie eens ‘n stukkie gras in sig nie en  Tharwat wat daar vir my so ‘n lekker drukkie gee is nou ‘n tienermeisie wat nie eintlik meer drukkies gee nie. My frons sê alles – ek was oorweldig en sonder visie en plan vir It’s Amazing! ZT.

nKunsklasse vir die ‘Teachers’

By ons Arts and Crafts klasse in Hanover Park en Gugulethu val die klem op ‘saam’. Die teachers leer saam met die kinders, sukkel saam, lag saam en wees saam bly oor die eindproduk.

Marelise en Louise Slabbert (Kunsonderwyseres by Dunatos Remediërende Skool), het ingewillig om die teachers bietjie touwys te maak in ‘n paar basiese dinge sodat hulle dit weer vir die kinders kan leer.

Die teachers leer prakties verskillende tegnieke.

Die teachers spog met hul pragtige kunswerke.

Die Arts & Crafts kinders van Athwood Primary met hul kaartjies wat hul vir Vadersdag gemaak het (links), en waar hulle besig is om colour mixing chart te maak (regs).

Ons is baie opgewonde oor hierdie klasse en ek glo dat ons nog groot hoogtes gaan bereik met die kinders se talent.

Hoekom is kuns belangrik?

Kinders wat dikwels sukkel in ander leerareas presteer in die kunsklas. Kuns bevorder die kreatiewe, intelektuele, emosionele en sosiale ontwikkeling van die kinders.  Dit het groot terapeutiese waarde.

Dit help ons om te ontdek dat ons almal indiwidue is en dinge verskillend interpreteer. Die kinders moet hulself nie met 'n ander vergelyk nie. En oorspronklikheid moet aangemoedig word.  Met die bewusmaking van lyn, vorm, kleur, patroon, ritme, balans, ens. gaan `n nuwe wêreld vir hulle oop. 

Kinders leer hoe om sistematies en stap vir stap te werk. Die vreugde lê in die kreatiewe proses en `n pragtige produk is net `n bonus. 
 
Leerders leer om detail waar te neem. Ter selfde tyd help dit ook met die ontwikkeling van hul verskillende sintuie.

Almal moet leer om op te ruim waar hulle gewerk het en om respek te hê vir die materiaal, die omgewing en vir mekaar. 

Visuele kuns help 'n kind om die verhouding tussen jou as mens en die omgewing rondom jou beter te verstaan.

'n Geleentheid om 'n verskil te maak

Kinders wat na It's Amazing! ZT se Arts & Craft klas toe kom kry nie net kreatiewe stimulasie nie, maar ontvang ook 'n broodjie en 'n vrug.

Die voltooide produkte neem die kinders met groot trots huis toe.

Deur 'n skenking van slegs R50 per maand - kan jy 'n kind help om die deelname moontlik te maak .

Na ‘n jaar is Ashura uiteindelik by die huis.

Die uitdagings is baie.

Een van Tasneem se dogtertjies, Ashura (8), is 22 Julie 2017 omgestamp deur ‘n bakkie en in ‘n kritieke toestand in Rooikruis Hospitaal opgeneem. Sy het baie ernstige hoofbeserings opgedoen.
 
Nou, ‘n jaar later is Ashura terug by die huis. Sy was vir maande in Rooikruis Hospitaal, maande in St Josephs Kinderhospitaal en het later naweke huis toe gekom. Tans is Ashura by die huis en Tasneem is verantwoordelik vir haar versorging. Dit gaan beter met Ashura, alhoewel sy 24-uur versorging nodig het (sy kan nie praat, eet of loop nie).
 
Bid asseblief vir Tasneem en ook vir haar ander drie dogtertjies (Jamielah, Asieka en Iptishaam).

Links: Tasneem saam met Ashura.
Middel: Ashura kommunikeer met behulp van die prentjies op haar 'Buggy'.
Regs: Die 4 sussies vroeёr vanjaar.