Die vennootskap tussen die RPO en Peritum Agri Instituut (voorheen BathoPele) in terme van die nasionale diploma in diereproduksie is tydens die nasionale RPO se onlangse kongres verder verstewig toe ‘n kontrak tussen die twee organisasies onderteken is.
Die diploma in diereproduksie is 'n volwaardige nasionale kwalifikasie en is as a NQF-5 kwalifikasie by SAQA geregistreer. Die kursus is uniek in die opsig dat dit oor 'n periode van 18 maande versprei word. Hoewel geen formele eksamen ná afloop van die kursus afgelê word nie, word die werkstukke wat deur die studente ingehandig word, onderwerp aan streng assessering wat die kwalifikasie nie 'n maklike taak maak nie.
Goeie terugvoering van studente wat die kursus deurloop het, is verkry. Die diploma-kwalifikasie bied aan studente wat om een of ander rede nie 'n formele kursus aan 'n universiteit kan deurloop nie, 'n alternatief om 'n kwalifikasie in diereproduksie te verwerf. Die kursus bied studente ook die geleentheid om by wyse van 'n oorbruggingskursus 'n formele graad-kwalifikasie te verwerf.
Die RPO is verbind tot die vennootskap met Peritum Agri Instituut en sal studente ook bystaan sover dit indiensopleiding betref.
|