Azərbaycan UNWTO-nun İranda keçirilən seminarında təmsil olunub

Noyabrın 12-dən 14-dək İran İslam Respublikasının Həmədan şəhərində Ümumdünya Turizm Təşkilatının (UNWTO) Assosiativ üzvlərinin 40-cı Plenar Sessiyası keçirilib. Tədbirdə Azərbaycanı Bakı Turizm İnformasiya Mərkəzinin direktoru Rüfət Bağırov təmsil edib. 

Plenar sessiya çərçivəsində İranın “Mədəni İrs, Sənətkarlıq və Turizm Təşkilatı” ilə birgə “Mədəni turizmin innovasiya və texnologiya ilə qorunması” adlı beynəlxalq seminar təşkil edilib. Beynəlxalq seminarda mədəni turizmin inkişafında, destinasiyaların cəlbediciliyi və rəqabətliliyinin gücləndirilməsində innovasiya və texnologiyanın rolu mövzusunda müzakirələr aparılır.

Tədbir iştirakçılara qarşıya qoyulmuş məqsədlərin icrası üçün illik proqramı müzakirə etmək imkanı tanıyaraq, əməkdaşlıq və birgə təşəbbüslərin qurulması üçün əlverişli mühit yaratmışdır. 

Azərbaycan 2001-ci ildən BMT-nin Ümumdünya Turizm Təşkilatının üzvüdür. Bakı Turizm İnformasiya Mərkəzi isə 2011-ci ildən etibarən quruma assosiativ üzv olaraq qəbul edilib.

Azərbaycan Hotel Assosiasiyasının Birinci Baş Assambleyası keçiriləcək

15 noyabrda Azərbaycan Hotel Assosiasiyasının İdarə Heyətinin görüşü keçirilib. “Hotrec – Hospitality Europe” təşkilatının vitse-prezidenti, beynəlxalq ekspert Akos Niklainin də iştirak etdiyi  görüşdə 4 dekabrda keçiriləcək Azərbaycan Hotel Assosiasiyasının Birinci Baş Assambleyası haqqında müzakirələr aparılıb. 

Qeyd olunub ki, Assambleyanın məqsədi qonaqpərvərlik sənayesi mütəxəssislərini bir araya gətirərək yeni yaradılmış Azərbaycan Hotel Assosiasiyasının strukturu, nizamnaməsi, məqsədləri və gələcək fəaliyyəti haqqında məlumat verməkdir. Assambleyada Azərbaycanda tətbiq olunacaq yeni Milli Ulduz Təsnifat Sistemi də təqdim ediləcək.

Baş Assambleya qonaqpərvərlik sahəsində mövcud potensialı inkişaf etdirmək, xidmət səviyyəsinin keyfiyyətini artırmaq və mövcud çatışmazlıqları müzakirə etmək üçün platforma rolunu oynayacaq.

Əlavə edək ki, bundan öncə “Hotrec – Hospitality Europe” təşkilatının vitse-prezidenti Akos Niklai Dövlət Turizm Agentliyinin sədri Fuad Nağıyevlə görüşərək, Azərbaycan Hotel Assosiasiyasının yaradılması və onun beynəlxalq təşkilata müşahidəçi statuslu üzv olması məsələsini müzakirə edib.

4 dekabr 2018-ci ildə keçiriləcək Azərbaycan Hotel Assosiasiyasının Birinci Baş Assambleyasında iştirak etmək üçün qeydiyyatdan keçmək mütləqdir.

Qeydiyyat üçün: info@hotelassociation.az