|
A cita de outubro do Clube de Debuxo adopta por cuarta vez a forma de sesión de debuxo con modelo en vivo na Fundación Luis Seoane (rúa San Francisco, 27, 15001 A Coruña). Será o venres 25 de outubro, de 19:00 a 21:00.
De novo, para permitir realizar un debuxo áxil, as poses do modelo serán curtas, de entre un e dez minutos, e o recomendable será moverse pola sala, malia que haberá cadeiras para quen queira.
As actividades do Clube de Debuxo están dirixidas a ilustradores, animadores, debuxantes de cómic e estudantes de ilustración. No caso dos socios da AGPI, a actividade é gratuíta, pero aos non socios nesta ocasión pediráselles un donativo de 2 euros (na propia sala), para cubrir o pagamento do modelo. Cada asistente, como é habitual, debe levar o seu propio material de debuxo. Para realizar a inscrición, só hai que cubrir este formulario en liña: bit.ly/33uZjUz. O prazo de inscrición remata o 24 de outubro. O aforo é limitado, e as prazas serán adxudicadas por rigorosa orde de inscrición.
Esta é a sexta sesión do Clube de Debuxo, e a cuarta das realizadas con modelo na mesma Fundación Luis Seoane; anteriormente realizáronse outras nun ensaio da Sinfónica de Galicia e na piscina municipal do Club do Mar da Coruña.
O Clube de Debuxo naceu coa intención de realizar unha práctica interesante rodeados de compañeiros, ademais de crear un punto de encontro entre profesionais onde compartir as nosas experiencias e inquedanzas. Ata o de agora, todas as sesións foron situadas na cidade da Coruña, mais en breve abrirase o abano de localizacións a outras zonas da comunidade galega.
|
