Tradicionalmente acostumóusenos a pensar que os animais de especies distintas da nosa son cousas que podemos empregar á vontade, e por cuxa situación non nos temos que preocupar. Porén, esa idea está a ser abandonada por moita xente, paseniñamente. Por que é que isto está a acontecer? Que motivos teñen todas esas persoas que se están a unir, nun número cada vez maior, á causa da defensa dos animais? Que razóns hai tras esa mudanza?
O filósofo e activista Oscar Horta, unha das voces máis autorizadas actualmente na ética animal e na reflexión sobre a constitución moral e legal dos animais, exponnos neste libro cales son esas razóns. Entre outras cousas, argumenta que aquilo polo que nos pode danar ou beneficiar o que nos fagan non é o feito de pertencermos a unha certa especie e non a outra. Nin tampouco a intelixencia que teñamos, a simpatía que espertemos ou a situación de forza na que nos atopemos. O que conta é só se podemos sentir e sofrer. E iso acontece non só no caso dos humanos, senón tamén no dos demais animais non humanos, razón pola cal deberiamos respectalos. Na defensa dos animais sostén que dar pleno respecto só aos seres humanos é unha forma de especismo, nome dado á discriminación –análoga a outras coma o sexismo ou o racismo– dirixida cara a quen non pertence a unha certa especie. De resultas do especismo, billóns de animais son explotados e matados anualmente de xeitos terríbeis. Outros sofren e morren en circunstancias nas que poderían ter sido axudados, tanto no caso de animais inxustamente traídos ao mundo polos seres humanos coma no de moitos outros que viven no mundo salvaxe. Dese xeito, o especismo aniquila toda posible integración e comprensión da alteridade afectiva e existencial dos animais, inscribíndoos como subalternos sen dereitos, sempre a disposición do humano.
Este libro sitúanos fronte a un problema que transcende a mera dimensión teórica, e que se revela como un dos factores centrais da metamorfose á que se encamiña a sociedade en conxunto e a persoa en singular. Desde unha minuciosa análise, cunha linguaxe non especializada pero si rica en argumentos, o autor convídanos a mudar a situación dos animais, póndonos do lado daqueles que non tiveron a sorte de naceren humanos, e dando o paso adiante que precisan, a prol da súa defensa.
Máis información no no noso sitio web
Mercar o libro na nosa tenda online
Descargar un fragmento
|