Duiwelsgat is nét duskant die hemel! Dis wat ons gedink het toe ons onlangs dié staproete van Eikebome tot in die Uitkykpas in een dag gestap het. All Trails sê dit is 25,4km, maar volgens ons slimhorlosies is dit nie meer as 22km nie.
Die maan was net besig om te sak toe ons omstreeks 7:00 begin stap het met die tweespoorpaadjie op in Sederhoutkloof, met pragtige wabome langs die pad, wat ons tot by die Sneeuberghut geneem het. Dit het ons twee ure geneem om tot by die hut te stap waar ons 'n ontbyt geniet het. Ons was nogal ontsteld om 'n leë Coke-bottel en 'n visblikkie te sien lê in en om die hut. Rommelstrooiers op enige plek, maar veral in die berg, maak mens die duiwel in!
Toe het ons die voetpad oor die plato, waar letterlik duisende suikerbosse (Protea repens) staan, gevolg in die rigting van Duiwelsgat. Verder klou die voetpad verbete aan die hange van die steil berge tot in die gat self. Net voor mens weer uit die gat stap, is daar 'n deel wat nét soos in die Knysna-woude lyk! Met varings, mos en stroompies net waar jy kyk, behalwe vir die sederbome wat hoog teen die rotse bokant groei. Die uitsigte in daai klowe af is moeilik om te glo of te beskryf en mens kan net nie lank genoeg kyk nie, so mooi is dit. Kort na die bopunt van Duiwelsgat is daar koningsproteas (Protea cynaroides) aan jou linkerkant. Dié proteas was so te sê klaar geblom, maar nog steeds baie mooi.
Vandaar stap mens oor 'n plato met 'n grasvlakte wat se "hare" baie deurmekaar is en dan af en nogmaals af tot in die Uitkykpas (knip maar die groottoonnaels ekstra kort).
Dis ongeveer 8 ure se stap (met 'n paar stoppe, rondkyktyd en tyd om foto's te neem). All Trails sê dis 'n moeilike stap, maar mens hoef ook nou nie so bang te wees soos die duiwel vir 'n slypsteen nie. Ons het erger verwag, maar ek sou sê mens moet darem redelik fiks wees.
Boonop ... ledigheid is die duiwel se oorkussing, gaan stap liewers Duiwelsgat.
Moet groot asseblief geen rommel strooi in ons berge nie!
Cederberg Click Click
Alicia Erasmus
|