Reguleringsarbeid og planar for massehandtering

I prosjektet Stad skipstunnel arbeider ein på fleire frontar. Kystverket, Stad kommune og Multiconsult arbeider med detaljreguleringar av tunnelopningane og områda rundt. Samtidig pågår det eit omfattande reguleringsarbeid i kommunane for å kunne utnytte steinmassane frå tunnelen best mogleg. Parallelt arbeider Kystverket med konkurransegrunnlaget for totalentreprisa.

Korleis skal områda rundt portalopningane sjå ut, og kva slags moglegheiter (hamner, friluftområder, næringsanlegg…) kan tunnelutbygginga gi i nærområda? Kystverket, Stad kommune og Multiconsult arbeider med landskapsplan og detaljregulering for tunnelportalane og næringsområde på Kjøde og i Lesto (Moldefjorden). Dette vil det bli orientert meir om i eit eige informasjonsmøte, sjå lenger ned.

Det er ei betydeleg mengde steinmasse som skal takast ut av tunnelen, opp mot seks millionar kubikkmeter sprengt fjell. Massane kan gi moglegheiter for regional næringsutvikling og bidra til auka verdiskaping og sysselsetting i ein litt pressa region, samstundes som det kan auke samfunnsnytta til heile prosjektet. Dei tre kommunane i nærleiken av skipstunnelen (Vanylven, Stad og Kinn) er tydelege på at dei ønsker steinmassar til lokale næringsprosjekt (hamne- og moloutbygging, utviding av eksisterande næringsområde og utfylling til nye næringsområde), men dei treng meir tid for å planlegge og prosjektere tiltaka.

Tida kommunane bruker for å regulere og prioritere massetiltaka kan Kystverket samtidig bruke til å jobbe fram eit grundigare og betre kvalitetssikra konkurransegrunnlag for totalentreprisen. Ein håpar å kunne lyse ut konkurransen mot slutten av 2022, men på grunn av kompleksiteten i prosjektet, mellom anna med detaljplanlegging for massehandtering, kan det bli ei forskyving til starten av 2023.

Blåmyra skal levere design til skipstunnel-prosjektet

Etter ei anbodsrunde er Blåmyra vald ut som leverandør av grafiske tenester for prosjekt Stad skipstunnel. Blåmyra held til i Selje i Stad kommune.

– Blåmyra står fram som ein solid leverandør, som både har nyttig erfaring frå store regionale utviklingsprosjekt og samtidig har folk med lang fartstid frå byråverksemd i meir urbane strok, seier kommunikasjonsansvarleg i Stad skipstunnel Sveinung Nedregotten. Han er nøgd med å kunne velje ein lokal leverandør.

– Blåmyra var eit av fleire lokale designbyrå som peika seg positivt ut. Vi er opptekne av tunnelprosjektet skal skape synergiar i regionen, og er glade for å kunne velje ein lokal aktør, seier Nedregotten.

Blåmyra skal arbeide vidare med profilen til prosjektet og levere grafiske tjenester som kan vere med på å marknadsføre skipstunnelen.