Id-19-il-Ħadd ta’ Matul is-Sena – Sena B
8 ta’ Awwissu 2021

Qari mill-Evanġelju skont San Ġwann – Ġw 6:41-51

F’dak iż-żmien, il-Lhud bdew igergru fuq Ġesù għax kien qal: “Jiena hu l-ħobż li niżel mis-sema”. U bdew jgħidu: “Dan mhuwiex Ġesù bin Ġużeppi? Lil missieru u ’l ommu ma nafuhomx? Mela kif qiegħed jgħid: ‘Jiena nżilt mis-sema’?”.

Ġesù weġibhom: “Toqogħdux tgorru bejnietkom. Ħadd ma jista’ jiġi għandi jekk il-Missier li bagħatni ma jiġbdux lejja; u jiena nqajmu mill-imwiet fl-aħħar jum. Hemm miktub fil-Profeti: ‘U kulħadd ikun imgħallem minn Alla’. Mela kull min jisma’ lill-Missier u jitgħallem minnu jiġi għandi. Mhux għax xi ħadd qatt ra lill-Missier ħlief dak li hu minn Alla; hu dan li ra lill-Missier. Tassew tassew ngħidilkom, min jemmen għandu l-ħajja ta’ dejjem.

Jiena hu l-ħobż tal-ħajja. Missirijietkom kielu l-manna fid-deżert, u mietu; dan hu l-ħobż nieżel mis-sema, biex min jiekol minnu ma jmutx.

Jiena hu l-ħobż il-ħaj, li niżel mis-sema. Jekk xi ħadd jiekol minn dan il-ħobż jgħix għal dejjem. U l-ħobż li jiena nagħti huwa ġismi għall-ħajja tad-dinja”.


Il-Kelma tal-Mulej.
R/. Tifħir lilek, Kristu.

Għeżież,

Din is-silta tifforma parti minn diskors twil li Ġesù jtenni wara l-miraklu tat-tkattir tal-ħobż. B’mod ċar Ġesù jidentifika l-ħobż li kien ta mal-istess ġisem tiegħu. Dan jurina li għalkemm l-Evanġelista San Ġwann iħalli barra r-rakkont tat-twaqqif tal-Ewkaristija waqt l-aħħar ċena bħalma naqraw fl-Evanġelji l-oħra, huwa jagħżel li jagħtina t-tifsira tal-Ewkaristija permezz ta’ dan id-diskors. 

M’hemmx dubbju mela li fi kliem Ġesù stess l-ikel li aħna nieklu meta nersqu biex nirċievu l-Ewkaristija huwa l-istess “Ġisem” tiegħu. Dan hu l-misteru kbir li aħna niċċelebraw f’kull quddiesa.

Talba – Ninżel għarkupptejja b’qima nadurak, veru Alla u veru bniedem.

Liturġija tad-Dar fil-Familja

Nhar ta' Erbgħa fis-6:30pm

Avviżi

Fuljett Flimkien

BeHold.mt

Katekeżi għat-tfal

Inħarsu s-saħħa tagħna u tal-oħrajn

Qari tal-Quddiesa