伍濤月訊 - 2021年8月

你今日過得好嗎？
看似簡單嘅問候，對於為人父母嘅各位，真係要諗一諗先可以誠實回應。若孩子係有特殊學習需要（Special Education Need）的話，想必整個家庭都需要更多愛與忍耐，先可以好好過每一日。
8月推介畀大家嘅，係伍濤同SENiA團隊一齊創作既新繪本《珊雅的一天》。故事講述一位專注力不足嘅孩子（SEN in Attention），常被形容為「一舊雲」，好難按時完成任務。幸好媽咪同珊雅之間有個「三字暗號」，一撳掣就釋放能量，幫佢哋度過無數困難。
今次創作，由SENiA團隊領袖嘉麗原創（佢都係伍濤核心義工嚟㗎！），由Lily老師親筆撰文繪圖，並由美聲孩子詠欣為我哋演繹，加上實習生天天嘅投入剪輯，簡直～PERFECTO～！

【社區青年大使畢業禮】
由6月初至今，兩位青年大使一心同埋天天，除咗同同工們一齊服務社區嘅孩子同家庭，而且仲得到兩個免費藝術師資培訓。踏入實習最後階段，同工們對兩位都依依不捨，特別係彪老師同埋華老師，以督導身份同行咗3個月，大家都建立咗一份真誠嘅師友關係。感恩有佢哋，令呢三個月嘅伍濤笑聲不絕，又一齊完成好多不可能嘅任務，仲大大拉低咗同工群平均年齡添！🙊衷心祝福你哋，將三個月所學，活學活用，繼續發光發熱，照亮他人！

【藝術工作坊 - 流體畫 & 中秋和諧粉彩體驗工作坊】
正所謂打鐵趁熱！6月份啱啱完成咗流體畫導師培訓嘅實習生，話咁快已經喺7-8月開咗幾個唔同嘅流體畫體驗班，接觸超過200人次，當中包括親子、藝術愛好者、企業員工、藝術素人、特殊教育藝術培訓師同埋特殊教育親子等等。另外，單單8月，伍濤同工就以和諧粉彩工作坊形式接觸超過70人次，傳遞「愛自己，愛家人，愛更多人」嘅正面訊息！
若果你都想一齊體驗以上兩種藝術工作坊，就千萬要留意番伍濤FB同IG，我哋會不時開班，唔好錯過！

【親子成果展 ＋ 橫風橫雨家訪送祝福 @ 深水埗宏恩】
繼6月份重啟逢周五入校服務，完成咗幼兒課程之後，8月初借用合作伙伴場地舉辦咗一次親子成果展，一共有23個小朋友同家庭帶住興奮心情來參加！不少小朋友仲記得義工們嘅名添呀！除此之外，8月底，義工們趁住開學前，包好一包包小禮物，兩個三個走入8個家庭，同孩子做手工玩遊戲，又關心下家長嘅開學前擔憂同情緒，為佢哋加油打氣！

祝福你： 在困難的日子，繼續與身邊的人彼此打氣！

期待同你一齊，繼續用藝術同故事，讓世界變得更美麗。
伍濤基金會 / 彪老師 / 志願者工程核心團隊  敬上

Bank Name: The Hongkong and Shanghai Banking Corporation Limited
Address of HSBC Office: 1 Queen's Road Central, Hong Kong. 
SWIFT code: HSBCHKHHHKH
Account Name: Wave5 Foundation Ltd.
Account Number: 015-662513-838