Dames en Here,
Hiermee September 2021 se Nuusbrief.
Ek hoop die nuusbrief vind julle in goeie gesondheid.
Daar was gedurende 2021 ‘n paar tak aktiwiteite aangebied en die opkoms was baie goed.
Die nasionale skietkompetisies is goed op dreef en ek gee graag die volgende deur: Nasionale President spanskiet ---- Hartbees A eindig 16e in die land. Baie geluk
Individuele presidentskiet kompetisie.
Johan van der Walt en Hannes de Kock het Platinum verower.
Carel Erasmus het 4e gekom onder die seniors.
MDS.
Meyer du Plessis het ‘n 3e plek gekry in sy kategorie.
.22 Nasionale skiet @ Welkom.
Ettiene Delport en Jan de Kock is uitgenooi en hulle skiet eersdaags. Baie sterkte.
Die skietbaan is weer oop vir lede. Neem asb kennis dat die protokol van toegang tot die perseel verander het. By die hoofingang moet al die skuts/lede/insittendes die voertuig verlaat en hulle voete dip. Daar is ‘n boek wat ook ingevul moet word by die hek. Die plaas se personeel gaan die voertuig se pedale en plekmatjies ook spuit met ‘n ontsmettings middel.
Laasgenoemde se prosedures is nie onderhandelbaar nie! Enige lid wat moeilik gaan wees oor die prosedures sal toegang tot die perseel verbied word.
Ons het ook ons eerste voorval gehad waar ‘n persoon nie bogenoemde gehoorsaam het nie. Die betrokke persoon is dan ook die skietbaan verbied. Bestuur gaan optree teen persone wat die versoek verontagsaam om sodoende die gebruik van die baan te beskerm.
Daar was ook ‘n geval waar ‘n skut stene op die baan verwyder en daarna skiet. Dit is nie opbouend nie en enige persoon met meer inligting hieroor kan bestuur kontak. Ons sal jou baanfooi vir 2jaar borg sou ons die skut vastrek met die inligting.
SAJWV het alle lede se toegewyde statusses vir 2021 behou, met ander woorde, almal voldoen aan die vereistes. As dit moontlik is moet alle lede tog vergaderings en skietdae bywoon waar moontlik.
Dankie aan al die persone wat bygedra het tot die ryding vir die baanopsigter. Sy is nou weer mobiel. Sien gerus ons webblad vir ‘n foto waar die Nissan bakkie oorhandig is.
Die SMS sisteem sal nie meer gebruik word nie. Die kostes verbonde aan die sisteem is baie hoog. Daar is ‘n WhatsApp groep waar inligting deurgegee word. Kontak bestuur of ander lede op die groep sodat hulle u uitnooi om by die groep aan te sluit.
OF ……. Skandeer die QR-kode hieronder.
Op die AJV is die baanfooi vir 2022 verhoog na R450 per jaar (vanaf 1 Februarie 2022). Dit is die eerste verhoging in 3 jaar. Seniors se fooie beloop R400 per jaar. Koeponne bly onveranderd op R100 per besoek per lid/gas.
Lede Versoeke, Probleme en Voorstelle:
Die bestuur doen weer ‘n beroep op alle lede om enige versoeke, probleme, onduidelikhede en voorstelle na ons te bring vir bespreking.
Dit is takbeleid dat ons lede met bogenoemde na die takbestuur sal kom om sake te bespreek wat tot almal se voordeel strek.
Die datums van vergaderings, skietdae, asook opleiding is op die webblad (
www.hartbees.co.za) beskikbaar. Die meeste van 2021 se vergaderings, opleiding en skietdae is op kalender beskikbaar.
TERUGVOER VANAF BESTUUR:
- Koeponne en baanfooie (kontant) kan by my kantore aangekoop word:
- Lektratek Water Tegnologie, 22b Forsmannstr, Potchindustria.
- Kontak persoon: Elsabè van der Walt.
- EFT kan soos per webblad gedoen word.
- Koeponne is ook beskikbaar by Advance Gunsmithing, CFJ du Plessis gebou, 390 Walter Sisulu laan, Potchefstroom.
- Hou die spasie dop ----- ons is besig met die beplanning vir die uitbreiding van MDS bane. Bestuur is baie opgewonde en verdere inligting volg binnekort.