2022-Week 39 - Church Weekly News 9/24

اللي في الصورة أعلاه ده اقوي راجُل انجبته الكنيسة القبطية الأرثوذكسية
مثلث الرحمات الأنبا دوماديوس مطران الجيزة المتنيح

*اللي منكم مايعرفش مين هو الأنبا دوماديوس فأحب أعرفكم إن الأنبا دوماديوس يبقى واحد من أقوى الرجال اللي أنجبتهم الكنيسة القبطية الأرثوذوكسية.... *

*لما أترسم أسقف كانت الجيزة فقيرة جداً.... لدرجة إن قداسة البابا_كيرلس السادس كان دايماً يهزر معاه ويقوله ضحكوا عليك وأدوك الإيبارشية الفقيرة

كان له مواقف شجاعة لدرجة إنه كان الوحيد اللي وقف و تحدى الرئيس السادات ساعة قراره الجمهوري بعزل قداسة المتنيح البابا شنودة الثالث من البابوية.... وكان السادات بيخشى قوة وشجاعة الأنبا دوماديوس

سنة 1985 أتعرضت كنيسة مارجرجس بنزلة السمان في منطقة الهرم لحالة أعتداء وتم غلقها وأتأثر نيافة الأنبا دوماديوس باللي حصل ومع كامل الأسف أصيب بشلل أدى إلى أن نيافته كمل حياته على كرسي متحرك.... سيدنا أنبا دوماديوس لما أتصاب بالمرض دة راح الأديرة كلها وكان بيصلي أن ربنا يشفيه.... وكان بيروح يتعالج في ألمانيا لكن الحالة كانت ميئوس منها.... وفضل الراهب القمص ثيؤدوسيوس أڤا مينا اللي في الصورة معاه يخدمه حتى بعد ما الراهب دة أصبح أسقف عام لكرسي الجيزة وصار حالياً نيافة الأنبا ثيؤدسيوس أسقف كرسي الجيزة ( أدام الله حياته ) ....

*نيافة الأنبا دوماديوس وهو على الكرسي المتحرك تم في عهده بناء 95 كنيسة.... و رسم وهو على الكرسي المتحرك أكتر من 200 أب كاهن.... ولما صار عاجز و قاعد على كرسي متحرك شجاعته أزدادت والمسئولين بقت تخاف منه وتعمله مليون حساب أكتر ما كان واقف على رجليه

وأتنيح نيافته في شيخوخة بارة بعد ما صنع من إيبارشية الجيزة الفقيرة دي درة الإيبارشيات
لدرجة ان بعد نياحته اتفكت إيباراشية الجيزة دي لخمس إيباراشيات بخمس أساقفة.... تخيل كدة لما المطران العاجز دة اتنيح الكنيسة جابت مكانه خمس أساققة..... تفتكر دة معناه إيه....؟؟؟؟

اللي عاوز أقولهولك في القصة دي أوعى تيأس وتقول أنا ضعيف وعاجز.... أوعى تقول أنا مقدرش.... أوعى تقول الظروف معجزاني.... لو أتمسكت بربنا يسوع المسيح وقولتله ياربي يسوع أشتغل بيا.... ساعتها ربنا يسوع هايستخدم عجزك وضعفك ويحولهم لنور.... نور ينور وسط ظلام العالم.... نور يصنع أمجاد ويغير من الواقع المؤلم ويحوله لجنة عدن الجميلة..... ولو مش مصدقني أسأل سيدنا الأنبا دوماديوس

+++ أنبا دوماديوس أنا عارف أنك واقف على رجليك في السما دلوقتي.... عارف ومتأكد.... أرجوك.... أشفع أمام المسيح في كل أنسان مريض أو يائس.... صلواتك عنا يا سيدنا

بمناسبة تذكار نياحة مثلث الرحمات الانبا دوماديوس مطران الجيزة

مثلث الرحمات الحبر الجليل الأنبا دوماديوس أسقف الجيزة

Schedule for the week of 9/24 - 10/1