E te whānau, tēnā koutou katoa

#TEAHOMATUA

Te Tūrei, te 28 o ngā rā o Noema 2023

He maimai aroha

Rongomai Taiapa-Aporo

Emaraina Mihaere

Auē te aroha! Aue e te iwi e. Tokorua ngā aituā raukura i mate atu rā i tērā wiki. Haere atu rā kōrua ki ō tātou tūpuna ki Hawaiki Nui, Hawaiki Roa, Hawaiki Pāmamao ki te Hono-i-Wairua. Takahia te ara tauwhāiti o Tawhaki ki ō kōrua mātua tūpuna.

Ko Rongomai Taiapa-Aporo he raukura nō TKKM Manawatū, ā, he kaiako i Te KKM o Mana Tamariki. He uri a Rongomai nō ngā moutere o Rakahanga rāua ko Manahiki i te Kuki Airini, ā, he uri hoki nō Te Whānau ā-Apanui, nō Ngāti Porou hoki. Nehu atu ai a Rongomai ki te taha o ōna mātua tūpuna ki Te Whānau o Tuwhakairiora. Ko te kāinga, ko Wharekahika. Ko te rohe, ko te Matakaoa i roto i a Ngāti Porou.

Ko Emaraina Mihaere tētahi o ngā raukura tuatahi o Te KKM o Waipareira, Te KKM o Maungawhau me Te Wharekura o Hoani Waititi Marae. He uri nō Ngāti Paoa, Rongomaiwahine, Rangitāne ki Tāmakinuiarua, Tapuika anō hoki.

Ko te hunga mate ki a rātou. Tātou e te hunga ora, tēna tātou katoa.

He Rautaki Tautāwhi Tamariki

Ngā kōtiro nō Te KKM o Te Kōtuku

Ko wai ngā tino kaiako rānei ngā kaimahi rānei kei a rātou te haepapa ki te ārahi i ngā kaiako me ngā tamariki whakaraerae?

He hiahia nui tō te Te Rūnanga Nui ki te whakapā atu ki ngā tino pouako rānei ngā tino kaimahi rānei o ia kura e ārahi ana, e āwhina ana i ngā kaiako ki te tiaki i ngā tamariki whakaraerae.

I te wā ka whakarite pānui Te Rūnanga Nui mō te rautaki Tautāwhi Tamariki ka whakapā atu ki aua kaimahi me te Tumuaki o ia kura. Tēnā whakakīia te patapātai nei. E 2 meneti anake te roa hei whakakī i te patapatai.

https://forms.office.com/r/CAMFAz2RtN

He pūtea tautoko anō ka tukuna hei tiaki i ngā tamariki tautāwhi - $4,648.44

Kua whakawhiwhia e Te Rūnanga Nui he pūtea motuhake anō hei tautoko i ngā tamariki whakaraerae. Ko te tikanga, he pūtea tautoko tēnei hei utu i ngā nama kia haere atu te tamaiti ki tētahi mātanga whakamārie hinengaro kia tūwheratia ai tōna ngākau ki te koa me te aroha. Heoi anō, kei te whānau anō te mana me pēhea te whakapau i te pūtea tautoko nei hei tiaki ngā tamariki whakaraerae, i te mea mō te nuinga o ngā kura kāore i ā rātou he ratonga mātanga whakamārie hinengaro (Counselling services) reo Māori, whakaaro Māori ki tō rātou rohe, he tino pākehā te momo ratonga kei tō rātou rohe rānei kei tō rātou tāone rānei.

E $4,648.44 (excl. GST) te nuinga o te pūtea ka whakawhiahia ki ia kura, ahakoa te rahi o ngā tamariki, he kura teina rānei, he kura tuatahi rānei, he kura arongotahi rānei. Hei whakawhiwhi i te te pūtea nei me tono nama tāke hokohoko (GST invoice) ia kura ki a Whaea Trish. trish@runanga.co.nz

He rau paetukutuku mō Te Rautaki Tautāwhi Tamariki

Ki te hiahia koe ki te whai i ngā kōrero mō ngā take e pā ana ki te kaupapa Tautāwhi Tamariki, tēna, pānuitia ngā kōrero ōmua ki kōnei.

https://runanga.co.nz/tautawhi-tamariki/

Te Wānanga Pouako Hou 2024

He hōtaka whakangungu kaiako hou e whakahaerehia ana e Te Rūnanga Nui.

Ko te Aho Matua te tūāpapa. E tuwhera ana ngā rēhita mō te tau 2024.

Ānei te hononga - rēhita mō ngā wānanga whakangungu kaiako hou 2024

Mō ētahi atu kōrero, whakapā atu ki a Bab Walker, bab@runanga.co.nz

Te Kura Pouako

Kura Kaupapa Māori

Te Aho Matua

He mātua rānei, he ākonga Tau 13 rānei, he raukura rānei kei te hiahiatia te whai i te huarahi ūmanga Kaiako Kura Kaupapa Māori? Tēnā, kei ngā tūhono ipurangi nei ngā whakamārama, tukuna atu ki ā rātou.

Te Aho Tātairangi

3 toru ngā tau te roa

Te Aho Tātairangi Bachelor of Teaching and Learning Kura Kaupapa Māori

Rā aukati: 13 Hanuere 2024 mō ngā tono

Te Aho Paerewa

1 tau te roa

Te Aho Paerewa Postgraduate Diploma Teaching and Learning in Māori Medium

Rā aukati: 9 Pepuere 2024 mō ngā tono

Mō ētahi atu kōrero, tēna, whakapā atu ki a Brian Paewai rānei ko Anahera Bowen.

Tūranga Wātea

Mehemea he pānui tūranga wātea kei tō kura, tēnā, tukuna mai te pānui ki a Trish Bevan.

Te Kura Kaupapa Māori o Te Ātihaunui a Pāpārangi

He tūranga wātea ki te kura tuatahi

E rere kau mai te Awa nui mai i te Kāhui Maunga ki Tangaroa, ko au te Awa,ko te Awa ko au.

E ngā manga iti, e ngā manga nui tēnei te karanga a te whānau o te kura kia piri mai ki te whakatutuki i te ohākī o te kura i homai e te koroua e Morvin Simon, “whakamanatia ā tātau tamariki, mokopuna, kia mōhio, kia tū kaha, kia noho ngāwari atu”

E rapu ana mātau i tētehi kaiako e mau rēhita ana, e māia ana hoki ki te whakaako i ngā reanga o te kura tuatahi, arā, i ngā Tau 5. Tukua mai tō tātai pūmanawa, he reta e whakamārama ana i ō tūmanako mō te reo me ngā taipitopito mō ngā kaitautoko tokorua.

Ka kati te homaitanga o ngā tono hei te 30 o Noema 2023. Ka tū ngā uiui me te Poari i mua i te 15 o Hakihea, ā, ko te kaitono ka angitu ka pōwhiritia ki te kura ā te 29 o Kohitātea 2024.

Mehemea he pātai āu, whakapā mai ki te Tumuaki a Betty-Joe Wiari. tumuaki@teatihau.school.nz Nama waea 021 02379287

Te Kura Kaupapa Māori o Whakarewa i te Reo ki Tūwharetoa

He tūranga tūmuaki

"Te tangi a te iwi kua riro rā, ko te mana motuhake kia ū

Tuku whakarere iho tō mana Māori, puritia kia kaha

Ruia taitea! Ruia taitea!"

He karanga ki te raki, he karanga ki te tonga

he karanga ki te marangai, he karanga ki te uru,

E matatau nei koe ki Te Aho Matua?

E matatau nei koe ki Poutiria Te Aroha?

E matatau nei koe ki te Tūwharetoatanga?

E matatau nei koe ki te reo tūpuna?