Tūranga Wātea
Mehemea he pānui tūranga wātea kei tō kura, tēnā, tukuna mai te pānui ki a Trish Bevan.
Te Kura Kaupapa Māori o Te Ātihaunui a Pāpārangi
He tūranga wātea ki te kura tuatahi
E rere kau mai te Awa nui mai i te Kāhui Maunga ki Tangaroa, ko au te Awa,ko te Awa ko au.
E ngā manga iti, e ngā manga nui tēnei te karanga a te whānau o te kura kia piri mai ki te whakatutuki i te ohākī o te kura i homai e te koroua e Morvin Simon, “whakamanatia ā tātau tamariki, mokopuna, kia mōhio, kia tū kaha, kia noho ngāwari atu”
E rapu ana mātau i tētehi kaiako e mau rēhita ana, e māia ana hoki ki te whakaako i ngā reanga o te kura tuatahi, arā, i ngā Tau 5. Tukua mai tō tātai pūmanawa, he reta e whakamārama ana i ō tūmanako mō te reo me ngā taipitopito mō ngā kaitautoko tokorua.
Ka kati te homaitanga o ngā tono hei te 30 o Noema 2023. Ka tū ngā uiui me te Poari i mua i te 15 o Hakihea, ā, ko te kaitono ka angitu ka pōwhiritia ki te kura ā te 29 o Kohitātea 2024.
Mehemea he pātai āu, whakapā mai ki te Tumuaki a Betty-Joe Wiari. tumuaki@teatihau.school.nz Nama waea 021 02379287
Te Kura Kaupapa Māori o Whakarewa i te Reo ki Tūwharetoa
He tūranga tūmuaki
"Te tangi a te iwi kua riro rā, ko te mana motuhake kia ū
Tuku whakarere iho tō mana Māori, puritia kia kaha
Ruia taitea! Ruia taitea!"
He karanga ki te raki, he karanga ki te tonga
he karanga ki te marangai, he karanga ki te uru,
E matatau nei koe ki Te Aho Matua?
E matatau nei koe ki Poutiria Te Aroha?
E matatau nei koe ki te Tūwharetoatanga?
E matatau nei koe ki te reo tūpuna?
E matatau nei koe ki te raranga i te tira?
Ko wai rā!? Ko wai rā!?
He tūranga Tumuaki ka watea ai a te 05 o Huitānguru, 2024.
Me ka āe mai koe ki ngā uinga pou whakaaro o runga ake nei tēnā,
kia whakapā atu ki te Tari o TKKM o Whakarewa i Te Reo ki Tūwharetoa,
ka riro i a koe te whānuitanga o ngā kōrero.
Ka ngū te reo karanga a te kōutuutu mai i te 22 o Hakihea.
Mehemea he pātai āu, whakapā mai
whakarewa@whakarewa.school.nz
07 378 2208