Det bles til tider friskt rundt Stad. Men det gjer det sanneleg i mediene også. Medieoppslaga om skipstunnelen innheld både motstand og støtte til prosjektet.
– Vi kan ikkje forhalde oss så mykje til det som diskuterast, anna enn å kome med faktaopplysningar om prosjektet, pågåande arbeid og framdrift. Vi har fått eit mandat frå Stortinget om å bygge ein ny sjøveg gjennom Stad, og held oss til det. Men at det er stor interesse rundt prosjektet, og at skipstunnelen engasjerer, er berre bra. Det gjer prosjektet betre, seier prosjektleiar for Stad skipstunnel i Kystverket, Terje Skjeppestad.
Status
Arbeidet med reguleringsplanar går sin gang. Det gjeld både reguleringa for tunnelopningane og regulering av nye og eksisterande næringsområde som skal ta i mot stein frå skipstunnelen. Dette er omfattande og tidkrevjande arbeid.
– Vi er i sluttfasen med å få oversikt over behova for steinmassar og kor mykje masse kvart enkelt tiltak treng. Vidare ønsker vi ei prioritert liste frå kommunane om kva tiltak som bør få stein, for vi har ikkje stein til alle tiltaka. Truleg har vi denne oversikta klar tidleg på nyåret, seier Terje Skjeppestad.
Vidare arbeider ein med teknisk funksjonsbeskrivelse, som inngår i konkurransegrunnlaget som skal ut på anbod til entreprenørar i 2023. Meir om dette i eigen sak.
Detaljering og nye illustrasjonar
Det pågår elles eit spanande arbeid med å regulere, og ikkje minst detaljere, portalopningane og områda rundt. Målet er å få fram skipstunnelen som eit landemerke, der tunnelen og utsjånaden på denne vil vere styrande for arkitektur og framtidig utbygging i nærleiken. Arbeidet er inspirert av eksisterande topografi, materialar, fauna med meir på Stadlandet, samt innspel frå lokalbefolkninga, og skal ende med ein plan og detaljerte illustrasjonar på korleis skipstunnelen vil sjå ut ved ferdigstilling, og korleis området kan utvikle seg på litt sikt. Det blir ikkje heilt slik som tidlegare skisser, for det har skjedd mykje undervegs – ikkje minst i høve det som skal byggast og utviklast ved tunnelopningane. Men vi vonar det skal bli bra! Nye illustrasjonar og planar blir klar på nyåret.