Die SA Boerboktelersvereniging het die RPO versoek om die rolmerk van bokvleis te verander sodat dit kan onderskei tussen lammers, jong bokke en ou bokke soos wat by skape die geval is.
Daar word tans net een kleur vir bokvleis gebruik en dit verwar die mark. Die verbruikers besef nie wat hulle koop nie.
Die Vereniging wil bokvleis meer aggressief aan die publiek/verbruiker bemark en die verskillende rolmerke sal meer verbruikersvriendelik wees.
Die RPO ondersteun die versoek en die aangeleentheid sal bespreek word tydens die RPO Uitvoerende Raad wat in Januarie 2017 gehou sal word ten einde die prosedures wat gevolg moet word, te bespreek.
Droogtehulp aangekondig
In reaksie op die ergste droogte in Suid-Afrika sedert 1992, het die Departement van Landbou, Bosbou en Visserye en die provinsiale Departemente van Landbou, R212 miljoen toegestaan vir droogteverligting.
In die 2015/2016 finansiële jaar wat op 31 Maart 2016 geëndig het, het die departement R263 bewillig vir droogteverligting deur die omvattende landbou-ondersteuningsprogram (CASP), te herprioritiseer, terwyl die provinsies R198 miljoen beskikbaar gestel het by wyse van aandelebefondsing. Dié fondse is aangewend om boere wat deur die droogte geraak is, van kos en water te voorsien.
Lees meer ...
Invoer van landbouprodukte tydens die feesseisoen
Die Departement van Landbou, Bosbou en Visserye het internasionale besoekers wat Suid-Afrika tydens die feesseisoen gaan besoek of ná die vakansie na Suid-Afrika terugkeer, versoek om aan die land se invoervereistes vir landbou- en landbou gereguleerde produkte te voldoen.
As daar aan die vereistes voldoen word, sal dit die land help om die potensiële risiko van indringerspesies, buitelandse peste en siektes wat met ingevoerde plante, plantprodukte, diere, diereprodukte en ander gereguleerde produkte verbind word, te voorkom of tot die minimum te beperk.
Lees meer ...
Verhoging in heffings aangekondig
Meat Statutory Measure Services het aangekondig dat die statutêre heffing op 1 November 2016 sal verhoog soos gepubliseer in Staatskoerant nr. 38199 van 11 November 2014.
Die volgende funksies word deur die heffing befonds: -
- verbruikersgerustheid;
- verbruikerskommunikasie- en opvoeding;
- transformasie en ontwikkeling;
- navorsing en ontwikkeling;
- bedryfskakeling;
- produksie-ontwikkeling;
- voldoening aan wetgewing; en
- administrasie
Lees meer ...
Veediefstal by welsynsvergadering bespreek
Hoewel statistieke daarop dui dat veediefstal besig is om te daal, is dit besig om te styg weens die nie-aanmelding van sake, het die Dierewelsyn-koördineringskomitee (LWCC) tydense sy laaste vergadering gehoor.
Die RPO behoort ten volle in dié verband ondersteun te word en dit is noodsaaklik dat alle boere oortuig sal word om hul vee te identifiseer aangesien dit een van die grootste redes is waarom sake nooit verder gevoer word nie. Dit maak nie saak hoe klein die diefstal is nie, dit moet aangemeld word.
Lees meer ...
PPR gaan uitgeroei word
‘n Grootskaalse internasionale inisiatief vir die uitroeiing van Peste des petits ruminants (PPR) – ook bekend as skaap- en bokpes – ‘n hoogs aansteeklike virale dieresiekte wat groot verliese veroorsaak, is van stapel gestuur.
Die Verenigde Nasies se landbou-organisasie en die wêreld-organisasie vir dieregesondheid, die OIE, het $996.4m bewillig vir die eerste fase van ‘n 15 jaar-program wat daarop gemik is om PPR teen 2030 uit te wis.
Lees meer ...
Dieregesondheidsforum loods ‘n webtuiste
Die nasionale Dieregesondheidsforum het tydens sy laaste vergadering ‘n webtuiste geloods en die hoop is uitgespreek dat alle lede en besoekers dit waardevol en verbruikersvriendelik sal vind.
Dit bestaan uit die volgende dele:
- ‘n Tuisbladsy wat die jongste nuus van die naionale Dieregesondheidsforum bevat. Al nege provinsiale forums word ook hier verteenwoordig.
Lees meer ...
Interne parasiete lei tot baie vrektes
Uitbrekings van interne parasiete met talle mortaliteite, veral weens haarwurm het voorgekom, volgens die maandelikse verslag oor dieresiekteneigings soos informeel gerapporteer deur die Herkouer Veterinêre Vereniging van Suid-Afrika (RuVASA).
Die kliniese tekens van parasitisme is bloedarmoede, bottelkaak, gewigverlies en diarree. Besoek www.wormx.info vir meer inligting oor die FAMACHA en die vyf-punt plan-bestuurstelsels. Kontak jou veearts in verband met die toets (FECRT) wat gedoen kan word om vas te stel watter ontwurmingsmiddels steeds doeltreffend in jou kudde gebruik kan word.
Lees meer ...
Vat die ”Lampad"
Hier in Suid Afrika is ons gelukkig genoeg om fantastiese, veilige en beeldskone snelweë en agterpaadjies te hê om van noord na suid te toer. Daar is wel niks soos ‘n rumoerige restaurant en stadige diens om jou reis behoorlik te bederf nie. Maar wees bietjie avontuurlustig met ‘n goeie ou retro “bonnet fees”, iewers langs die pad, met ‘n mooi uitsig natuurlik!Hierdie Kersvakansie kan jy die langpad sommer ‘n mak lammertjie maak met hierdie heerlike skaapvleis padkosresepte.